Medieval Morning Prayer
Jesu Lord, blyssed thou be,
For all this nyght thou hast me kepe
From the fend and his poste,
Whether I wake or that I slepe.
In grete deses and dedly synne,
Many one this nyght fallyn has,
That I my selve schuld have fallyn in,
Hadyst thou not kepyd me with thi grace.
Lord, gyffe me grace to thi worschype,
This dey to spend in thi plesanse;
And kepe me fro wyked felyschipe,
And from the fendys comberance.
Jesu, my tunge thou reule all so,
That I not speke bot it be nede,
Hertly to pray fore frend and fo,
And herme no man in word ne dede.
Cryste, gyffe me grace, off mete and drynke
This dey to take mesurably,
In dedly synne that I not synke
Thorow outrage of foule glotony.
Jesu my lord, Jesu my love,
And all that I ame bond unto,
Thi blyssing send fro hevyn above,
And gyffe them grace wele to do.
My gode angell that arte to me send
From God to be my governour,
From all evyll sprytys thou me defend,
And in my desesys to be my socoure.